منتدى ابناء تنقسى الجزيرة


العبـــــــــــــــــير الفواحــــــــــــــــــــــــــــ
 
الرئيسيةالبوابةاليوميةمكتبة الصورس .و .جالتسجيلدخول

شاطر | 
 

 بستناك انا فى المطار

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ابواسيل
مشرف
مشرف


عدد المساهمات : 73
نقاط : 179
السٌّمعَة : 0
تاريخ التسجيل : 24/04/2010
العمر : 51
الموقع : الرياض

مُساهمةموضوع: بستناك انا فى المطار   الجمعة 7 مايو 2010 - 2:29

بستناك انا فى الكبرى
كان دائما قبل الزواج وفي ايام التحضير له اسمعه يترنم باغاني البنات:
حبيبتي تعال نتلم **** ما دام الريد اختلط بالدم **** انا ذنبي ايه شيلوني الهم
حبيبي المنقه والتفاح *** حبيبي عسل والناس مساخ *** بهاجر ليك عشان ارتاح
بستناك انا في الكبري*** اضحي ليك انا بي عمري**** عشان وحيد انا نقلوا مني
حبيبي تعال نبل الشوق********************** نسكن في العمارات فوق

فجأة وبدون سابق انذار اشوف اسموا في شاشة الجوال بعد الاتصال اتفقنا نتقابل في مقهي نخلو بنفسينا نشرب شيشه ونستمتع بالبيره خالي كحول ( حلوه نخلو وخالي) طلب عصير مشكل عشان ما نخش في برنامج عشا ... مع كركعت الشيشه ونفخ الدخان زي طابونة الحطب كما ذكرني عربيتي السهان بيرد زمن المقاولات في السودان... الوالد رحمه الله دائما كان لما اجي اركب معاي يقول لي عربيتك الدخاخينا تكتل دي الله اكفينا شرا وتوصلنا .... سرح حبيبنا بخياله وبدأ يتحدث عن الزواج مع تنهيدات ... الله العن العزوبيه وسنينا ضيعت زمنا في الفارغ ... استفزني الاساءة للعزوبيه فاصبحت ادافع عنها واعدد ميزاتها الجميلة وادعم كلامي والله النسوان ديل غير فلقت الراس والازعاج والليلة زعلانه وبكره عايزه تشتري شنو ماشه لي ناس فلانه ما تلقي منهم حاجه .... جره ليهو نفس دخان عميق الواحد فينا زمان زي المقطوع من شجرة الشغل بعد الشغل اجي بيت العزابه اعاين في التلفزيون نص جسموا جوه البطانيه الله اقطع البطانيه بتاعتي الزمان الكان فيها صورة نمر كل ما تعاين للصوره تقول النمر ده عايز ياكلك ريحتا زي بيت الجداد غايتوا البضوق العرس وحلاتو اندم علي اي ايام قعدا عازب والواحد بقا لما اطلع ساكت للسوق والنزهه تلقي ماسك يد المدام زي الخواجات سعيد جدا بالرفقه.... اخذته نفس شيشه لما عشرقته بعد الجمله الاخيره شربت شويه من البيره قلت ليهوا يا خوي انت بي طريقتك دي لي قدام المدام بتركب في ضهرك وتقطع ليك اضيناتك القايمات ديل .... تململ اخذ المسند بالكوع اليمين والله يا خوي انشاءالله تركبني حصان كمان إضني ديل تعملن شاورمه اهم شيء السعاده الانا فيها دي
في البدايه الواحد ضاعت 35 سنة من عمروا ساكت.... لقد لاحظت كل عشره دقائق الموبايل بتاعوا اعمل رنتين وهو بدوره يعمل رنتين بل اختلفت شكل الرنه هذه المره اصبحت طويله ففتح الخط ومن نبرة كلامه وتغيير صورة جلسته تأكدته انها المدام بعد انهاء المكالمه والجلسه بدأت تحلو مع تسخين حجر الشيشه اتخذ قرار بأن يذهب اذ المدام تطلبه فكانت لي خيبة امل بانهاء الجلسه وهي في اولها ... شنو يا خينا جايبني من البيت انا قاطع المشوار ده كلوا تقعد ليك نص ساعه وتقول لي ماشي قبل ما تمشي اسمع الكلمتين ديل انت خشيت علي الزواج من مرحلة انعدام عاطفي وبقيت مندهش بالتغير تعرف في علاقة وثيقه بين الانعدام والاعدام الله استر عليك ما تحصل مرحلة الاعدام والمرحله دي بتجي بعد الانصدام العاطفي وروتينة الحياة مما يؤدي للتهور والعنف اللفظي تصل المرحله الخطيره وانت ماشي لي حبل المشنقه تكون منفعل علي الشناق منفذ الحكم لما اتقطع الحبل اكثر من مره في رقبتك تقعد تكورك فيهوا الله شنو يعني احنا جاين ننشنق ولا نلعب..... وتعرف مافي فرق بين الانعدام والاعدام وفي كل الاحوال كل الطرق توصل الي روما فتصبح معدوم العافيه.
تعديل / حذف المشاركة
الرجوع الى أعلى الصفحة اذهب الى الأسفل
http:// http://tangse.alafdal.net/act?u=24&ak=ef2c10
 
بستناك انا فى المطار
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى ابناء تنقسى الجزيرة :: المنتدي العام :: منتديات الادب والثقافة والفنون :: منتد الشعروالشعراء-
انتقل الى: