الرحمه لشيخ العاشقين الراحل عبدالله محمد خير

الرحمة لشيخ العاشقين الراحل عبدالله محمد خير
لديه ثلاث دواوين شعرية (كلام فى الحب والوطن ) (أنا العاشق) (أشجان الشيخ العاشق)
من مؤسسى نادى الطمبور وقد شاركه بمفرداته قصائدة وشعره ونصحه لتقف أغنيه الطمبور مع مثيلاتها فى محراب الفنون بل وقد قامت اغانى الطمبور على كل من الفقيد العاشق عبدالله محمد خير وشيخ الشعراء المرحوم حسن الدابى والاساتذه النعام ادم وصديق أحمد ومحمد جبارة واخريييين قله .. وكلنا نعرف ثنائيته مع كروان الشمال الاستاذ العملاق/ صديق أحمد وتغنى بمعظم كلماته .. ومن منا لايعرف (توماتي - يازمان بالله أشهد - عديله عليك - تعال كلمني عن رؤياك - زينة العمر - اصحي وصحي المشاعر - سلطان زمانك - حبل الصبر - انا المعجب - انت ماعلمت قلبي الريد - ياقمرة) وكل القصائد الخالدة والتي صدحت بها حناجر عمالقة الطمبور الرحمة والمغفرة للشاعر عبدالله محمد خير والحديث عن شخصيه فى قامه الاستاز الفقيد عبد الله محمد خير يطول ويطول ولكن هذه بعض الاشياء اعرفها وسوف أنزلها لكم وفاءً منا في حق الراحل العاشق :-
توماتي - شيخ العاشقين عبدالله محمد خير
خلهن سوا لا تفرقن يالله توماتى انا بعشقن
دوره دوره انا بنتاوقن ولحظة مابقدر أفارقن
ليه عيونى الشوق حارقن والدموع دايرى تغرقن
والدن قال ما يمرقن خايف النظرات تلحقن
وخايف العين لاتعوقن كان زمان لى شتلو يسقن
ومره فى اللوبى يورقن ديمه في القعده ينقنقن
ويحلفن لو ابي ما يصدقن الا وين تانى بيتلقن
وليه يحفظن الخالقن يا عيونى انا لا تزهجن
ولى مشاعرى انا لا تزعجن لى خيوط السعد انسجن
يمكن التومات يخرجن وفي عزابكن يتفرجن
خطوه ... خطوه ... بيندرجن
انا ما بخاف الموت والسجن والله جسمى الصبى يتعجن
هن مالن ابن ما يجن ويا الله مالى انا ماشى اجن
ما بصح يا الحاج اب شنب ولسه ديل ما بقو للادب
فى المعاملة ما تكون صعب انت ما تقسى على العنب
شمعتين اوعه من اللهب ولا تعكر موية الدهب
ونحن يا الزينيين لينا رب انا متلى كم زول مات بالشجن
وقبلى ود الزومه انسجن
من ضفاير بتموجن من خدودا بتوهجن
من تويمات اتخرجن من عيون اترابن نجن
فوق عروش الحيا توجن لى مريضن ما عالجن
انا قلبى نيرانو اتاججن ياخي كل اعصابو اتبنجن
وياخي قبلاتى اتعوجن انا امشى وين يا نور الدجن
*****
ما كفاى يا التومات اذى
وما كفاى انا لعب الخذى
هو طيف ! ويلاوز لى ملاوزه
ما التويمات انا حاجزه
وحاجه غيرن ما عايزه
يا الجمالكن بقى معجزه
ألسن النقاد عاجزه
انت جيب اوصاف موجزه
يا قليبى انا ياحبزه
تبقى حالتنا مؤجزة
وتكون معايشنا مجهزة
ولحظه تأخير ما جائزه
*****
ليه يضايقونا الناس كده
والغرام .. سنه .... مؤكده
أنا قلبي من اول ما بدا
بى غرام التومات شدا
والعيون مويته جامده
البعاد الطال سهده
البكى المكتوم شاهده
هي ليها سته شهور شارده
ومن زمان فارقت الندى
لا زيارات .... لا معايده
لا صدف عن ساعه الغدا
وهي مابتشوف ناس هاديه وهدي
انا قلت بالصبر ازوده
على البعاد يمكن اعوده
وهي تانى ترجع متمرده
تعيد اشواقه تجدده
روحى دركت .... منو ينجده؟
بلا التويمات الرايده
*****