راكوبه وهمبريب

بسم الله الرحمن الرحيم
الاحوة الاعزاء / السلام عليكم
الليلة عاوزين نتلمي ونظبط لينا راكوبه كاربه
ونجي كلنا ونتونس ونحكي ونشرب فيها الشاي والقهوة
تاكل فيها القراصة ونشرب فيها من السعن البارد
نطرح فيها همومنا ومشاكلنا ونتواعد بالفزع واللمة
اتمني يشارك فيها الجميع صغار وكبار حريم ورجال ونضحك
فيها من الاعماق

الاخت بت الفكي , تحياتي ,,إنتي فرعتي الموضوع وتاكيتي الباب ,,دي فسالة ولا شنو ,وما كان تبدي الكلام ,, ولا شنو ؟؟المهم انا ياخوانا كان إقترحت لمة الشباب خاصة الما شافوا تنقسي في البلد في العطلات بترتيب وتنظيم محكم عبر هذا المنتدى حتى يتجمع الناس في الخرطوم ويركبوا البصات المكيفة الما خمج ,وتقول لي لوري الخواجة؟؟ وهناك وبعد التعارف مع الاصول والاهل تنفذ برامج جماعية ثقافية ورياضية ,, تنير ليل البلد وتزهر الليالي ,, وتتوسع المعرفة ,, والاهم هو تلمس المشاكل الموجودة في تنقسي والعمل على حلها محليا وولائيا واتحاديا وكدة يكون المنتدى في طليعة خدمة تنقسي ,, شن قولكم ؟؟؟

الاميرالاي نورتا الراكوبه وجيتك دي بتستاهل رطيبات وجبنه كاربه

يا بت الفكى سلام اللون الاختريتهو ده ما راعيتى فيهو (عامل السن ) والله بى نضارتى بتاعة القراية ما قريتو وقريت (السعن ) السفن وقت يا جماعة الراكوبة الفيها السفن أب دى ما راكوبة الهنا وراكوبة المنا وأكيد بتلمو فيها الناس من هنا لى هنا لكن فى الشايفو ده والله غيرنا التلاته ما شفت لى زوول حايم الحكاية شنو ؟؟؟؟

التلاتة أصبحوا واحد وحتى الاميرالاى (عمل إنصراف لى نفسو ) رغم أن الرقيب حسن صالح قال لزميله(حسين أمين التنى ) وللجميع خلى وجهه نظرك التعمل ليك إنصراف !!!لكن طبعاً أى زول من رتبة عقيد وما فوق يستطيع أن يعمل إنصراف لى نفسو !!وخليتونى أتلفت زى عبدالمحسن فى بكا أولاد الاحمر !!!!!

أخونا بشرى , جاك كلامي , أهو دة الحال , حتى البفتح البوست ما بتابعوا بالموضوعات والرد , وانا شايفك كدة حا تعرض برة الدايرة , لكن قبل نمشي , ما تورينا حكاية بكا ود الاحمر دي الله يجازي محنك

الحبيب فيصل عبدالوهاب حمد على سلامة الطله وبركة (الجييت بركة الجييت عسل إنت وبسكويت!!!) مع تحياتى لبسكويت بركة !!! (إعلان مجان من بيرمجهام !!!لناس البرير عسى أن يخفف من لكمة البرير ) أنا شايل معاى موضوع درس اليوم بعد صلاة الفجر من بيرمنجهام وموضوع من حج ولم يرفت ولم يفسق رجع كيوم ولدته أمه، والباقى لى محطتين تلاته !!نسيت أقول ليك العيد مبارك عليكم وأنا صائم إن شاء الله إنت صايم (يا حاج ) أوعه تكون زايغ !أكان صايم معزوم معانا فطور (سماية الاخ عبدالكريم محمد سليمان والذى كتبت عن زواجة قبل سنه ونصف موضوع كل من قرأ الموضوع علق وقال والله أستطيع أن أحلف أننى حضرت عرس كريم فى بيرمنجهام ) وعلى العموم أسع خلينى أنزل ليك قصه عبدالمحسن فى بكا أولاد الاحمر والمثل والقصة من نجرى رقم أن القصة واقعية لكن صورتها بطريقة سيده ذاتو (عبدالمحسن مابعرفة وأصبح مثل متداول ) واللامانة لم تكن أنت الاول الذى يطلب منى القصة فقد سأل عنها قبلك أكثر من 20 مشترك فى منتديات أخرى طبعاً مستحيل يكون سأل عنها 20 فى هذا المنتدى لان حتى بت الفكى لم تتفاعل بالصورة التى وضعتها لها وفتحت لى عندما شاركت بالرد على بعض المواضيع الاخرى .

قصة عبد المحسن الشيخ فى بكا أولاد الاحمر

--------------------------------------------------------------------------------

الاخ عبدالمحسن الشيخ صاحبنا وزميلنا فى المدرسة حتى الامتحان من المتوسطة للثانوى العالى عبدالمحسن كان وقتها (المريخابى الوحيد بيننا ) لكن لما المريخ يغلب والله بكاوى مكواة براهو يوقفنا كلنا !!!وأذكر أن فتحى فرج الله ثيردباك المريخ كان عنيفاً مع مهاجمى الهلال .عبدالمحسن من ما تبدأ المباراة وفتحى يخم واحد من مهاجمى الهلال يفرح عبدالمحسن ويقعد يكورك ويقول (يا فرج الله دق التور !!!!) والمعنى لاعلاقة له بإسم فتحى فرج الله أو الكرة ولكن عبدالمحسن بصوته وكواريكة يغيظ كل الهلالاب داخل نادى السقاى (معليش دى كلها تخريمة ).
القصة أن عبدالمحسن لما دخلنا الجيلى وبعضنا أمضوابان الزراعية (دفعة الضايع ) وبحرى الحكومية وبحرى الشعبية وكنا فى ذلك العام 34 طالب ممتحنين من مدارس مختلفة عبدالمحسن كان مجموعه أقل ولم يجد مدرسة ورفض إتحاد المعلمين مع مجموعة من الناجحين وقتها !! وكان أتحاد المعلمين المسائى بحرى قوى جداً جداً. عمل عبدالمحسن فى مصنع النسيج السودانى بحرى وخلال عام وجد له عقد عمل فى السعودية القصيم وسافر فى العام 1976م وكان من أوائل من أغترب فى السقاى . وعمل فى شركة عبدالمحسن الراشد الحميد فى القصيم وكنت أراسله لذلك أحفظ العنوان حتى الان .لم يكن عبدالمحسن إجتماعياً من الطراز الاول مثلنا ويبدو أن الغربة المبكرة أثرت فية حيث أنه بقى 4 سنوات مره واحده حتى نزل أول إجازة ووجدنى فى المعاينات للدخول لكلية الشرطة . فى العام أو فى التمانينات حضر عبدالمحسن فى إجازة وذهب الصباح لتوصيل أغراض وعاد وجد الحله فاضية من الرجال والنساء ومافى إلا الصغار وكان قد توفى أحد أعيان آل الاحمر أهلنا بالسروراب (الباعوضة ) وهم أهل اللواء جلال الشيخ الطيب الاحمر الذى كان فى السفارة السودانية فى الرياض قبل سنتين (القنصل ) ومعروف لكل ناس الرياض (البارح كنت بتحدث معاهو تلفونياً فى مكتبة بجهاز الامن فى الخرطوم ) . عبدالمحسن رأسو إتملا !! ماذا يعمل وفى اللحظة التى قرر فيها أن يلحق الناس عاد الناس بالعربات والمراكب للحله !!! فقرر أن يذهب بكرة الصباح . تحرك عبدالمحسن ولم يجد معه أى شخص وحسب ما ذكرت لكم عبدالمحسن فى الحله ما بعرف الناس كويس !!! ومعتمد على أولاد حبوباتنا هناك الامين والمصباح وعلى وعبدالحفيظ !! لكن من أولاد الاحمر ما بعرف أى زول سامع بالاسماء فقط !!!! وصل وتلفت ما لقى أى زول بعرفو شاف الكوم الكبير البرفعو معاهو الفاتحة رفع الفاتحة وجلس بعيداً لم يعبرة أى شخص !!!!
وأستمر عبدالمحسن يتلفت ليرى من يعرفة دون جدوى !!! بعد ساعتين ظهر الاخ الامين عبدالله مضوى !! طوالى عبدالمحسن قام شال معاهو الفاتحة وبدون ما يشعر قال ليهو (وين أنتو والله أنا لى ساعتين أتلفت زى الطيرة !!! ) وضحك الامين وسط وجو البكا وأخذة مرة أخرى لاهل المتوفى وعرفهم عليه أن الزول ده عبدالمحسن ودالشيخ أمو الرضية حسن !! وهاك يافاتحة وسلام مصلّح !! ولما رجع أصبح يردد عباراتة (والله مشيت لى بكا لى أولاد الاحمر قعدت أتلفت زى الطيرة !!!!!)زووووول عرفنى مافى وما عرفت أى زول.

وأنا الحمد لله فى عرفتى وزمالتى وعملى وصداقتى مع الاميرالاى نفعتنى غايتو ما زى الطيرة لكن جنبها !!!!

--------بعض الردود على قصة عبدالمحسن الشيخ من منتدى العيلفون------------------------------------------------------------------------

تسلم يابشري والله قصة منتهي الروعة بالرغم ما بعرف عبد المحسن الشيخ لكن سردك للقصة جعلني ارسم له شخصية وهو يردد عباراتة (والله مشيت لى بكا لى أولاد الاحمر قعدت أتلفت زى الطيرة !!!!!)

التوقيع:
حلاة بلدي وحلاة ناسا وحلاة الطيبة والطيبين حلاة بلدي
ابو وعد

تيسير
عيلفوني جديد

--------هذه هى الاخت تيسير عثمان الطيب والدها عليه الرحمة عمل مساعد طبى فى مركز صحى السقاى لفترة طويلة 15 سنه من 1984 وحتى قرابة 1999 والتى كتبت الرد بنته التى عاشت طفولتها وحتى الثانوى العالى فى السقاى وتعرف عبد المحسن حق المعرفة واخوانة واخواته------------------------------------------------------------------------

اخى ود المبارك لك التحية فى كل مرة بتتحفنا بقصصك الرائعة وقفشاتك الجميلة تسلم وانت بتحكى فى قصة عبد المحسن بتخيل نفسى قاعدة فى السقاى وبمربى طيف من الذكريات الجميلة التى لايمكن ان تتنسى وعبرك برسل التحايا الي اولاد الشيخ ربنا يطراهم بالخير عبد المحسن وانور وعبدالحفيظ وعبدالمتعال وعبدالله شفتو قبل سنتين في زواج خالتى شرفونا فى العيلفون مع عبدالله زين العابدين والبدرى وعبدالمنعم محمد وعبدالعزيز زين العابدين ربنا يمتعك بالصحة والعافية وتتحفنا اكثر واكثر ياسيادتو

يا بشرى أخوي الظريف , تسلم , والله مشتاقين , لقعدة معاك أقصدجلسة , هو تاني في قعدات ؟
وقصة أخونا عبد المحسن لذيذة وفيها عبرة لضرورة معرفة الناس والدخول فيهم لمثل هذا اليوم وحتى في الافراح والا الواحد يعدوا اهل العريس من اهل العروس وديل من ديك وتجوط الامور , ربنا يحفظك , وما يهمك من عدم الردود والتفاعل خلاص تدرعنا وصرنا محصنين ضد الصهينة .

الاخ الحبيييب فيصل عبدالوهاب بالمناسبة وييين أخونا فيصل حبييب برير؟؟ الاخ فيصل أبارك ليك العيد وفى العيد اليوم التانى جبت دليل الباحث دورة الزمالة السابعة مارس 2004-2005م وأتصلت على 20 من الدفعة لم أجد إلا الاخ مبارك سليمان عثمان أحمد (سليمان كلو شىء والده عليه الرحمة كان من مراجع الطيب عبدالجليل فى بحثه فى الماجستير عن الجنسية والهوية فى ولاية القضارف) ووجدت بنت الاخ عثمان أبوالهول وزوجة الاخ عباس الطيب يوسف ودالسقاى !!كنت بصدد الاتصال عليك لكن (قام بيى شربوت شربتو فى العيد !!!!هههههه) ما تقول بشرى أنسخت على كبرو !!.
فى إتصالاتى الكثيرة على الاخ فتح الرحمن كردقيلى ذكر لى ذات مره قابله عوض بووت فى مجمع عفراء (بى منظر كئييب وغير مهندم !!) فقال لى كردقيلى الجابك عفراء شنو !!كردقيلى قال ليهو الجابك إنت شنو أنا ساكن بى جاى !!ومالك لابس وسخان كده والله ما بتشبة عفراء !!فقال له بقييت ببيع سمك بالجمله لى ناس عفراء بجيبو من سد مروى !!! فضحكت وقلت ليهو نسميهو عوض سمك !!فتذكرت أن الاسم محجوز بواسطة واحد دفعتو إسمو (هاشم سمكة ) يقال أنه كان شاطر فى السوق ونزل ملازم أول وفتح ليهو أكثر من مطعم سمك فى الثمانينات .
الاخ فيصل فى بوست الادب والشعر هناك قصيدة بعنوان سيد عوض فى الشرطة كان مييت كمد كتبتها للاخ عوض وداعة بمناسبة إحالته للصالح العام وكنت فى ذلك الوقت فى السودان لكن القصيدة كتبتها فى المانيا .
بحث الاخ العقيد فيصل عبدالوهاب

الرقم 26 إسم الباحث عقيد شرطة فيصل عبدالوهاب عوض الله
تأريخ الميلاد 1960م
الوحدة السجل المدنى
تلفون 091294881 (تلفونك ده شغال والله عند ولدك والله عند المدام معظم الارقام إما ضاعت أو وجدتها عند الزوجات أو الابناء أو البنات !!!!) وماشاء الله العيال كبرت والغريبة مافى رقم وجدتو عند االزوجة التانية ده إسمو كلام يا 46 !!أحرجتونا (مع أغنية راجل المره حلو حلا !!!!) .
إسم البحث حول الادارة العامة للسجل المدنى (النشأة التطور رؤية مستقبلية )
أهداف البحث :
1 . التوثيق والتأريخ لانشاء وتطور وتأسيس هذه الادارة
2 . إستباق حدوث المشاكل الفنية والتحوط والاستعداد بالحلول الناجعة .
3 . تقنيين إجراءات التأسيس حتى تسير بشكل سليم .
المشرف على البحث لواء شرطة دكتور عثمان جعفر عثمان
الممتحن الداخلى لواء شرطة عصمت دهب
الممتحن الخارجى لواء شرطة عوض الله عثمان عوض الله (عليه رحمة الله )

اليكم ايتها الايادي البيضاء التي تنور سماء دربنا الي اعزائي الكرماء كيف الحال والاحوال ان شاءالله تامين ولامين ونرحب بي عمنا النشط والفعال وربنا يخليك بس انصحك من خالي دا مايكسل همتك ههههه وربنا يعين الجميع وانحنا رجعنا ليكم تاني وبي قوه ودفعه اكتر وسوف نريكم المثير في الايام القادمه

مرحباً بى الخالو فيصل عبدالوهاب والله بختك إذا قالو ليك الولد (خال ) وعلى العموم أنا ما عارف عمرك كم (ورغم أن عمنا بستحقها وأصبحت تطلق على كثيراً ) رغم أننى (متشبشب شوية !!) لكن أنا فى منافسة معاك لو كتبت فى اليوم 10 مواضيع أنا بفوتك وحدى فى اليوم 200 جاهز من القديم والجديد !!! عموماً تحياتى لكن خالك (كبّر اللفة !!!).

الامير لاي وبشري وينكم يا ناس اه معزومين معانا جبنة وكمان ببخوره

أكيييد جبنتك دى يا بت الفكى محضورة لان المدام التى صبرت تلاتة أعوام فى بون ووصلتنا أخيراً الى بيرمنجهام بعد أن كادت أن (تحرد الجنسية الالمانية !!!) والحمد لله ليها شهر معانا وحضر برفقتها أخر العنقود أيمن عشر سنوات !!!لكن عينى بارده خشبو خشب 14 سنه طويل وعريض قولوا ماشاء الله تبارك الله !! والبارح أشتريت ليها أى للمدام كيلو بن وسحانة كهربائية ممتازة وقالت كدى أنعدلت على القهوه الماخمج !!!! شوفى لينا فيصل عبدالوهاب الاميرالاى وود أختو وبقية العقد الفريد والبلح بكل أنواعة على (أصلى تاجر بلح سعودى الايام دى !!!) . وكمان برضور تاجر عطور وبخور بكل أنواعة وبرضو سعودى وخليجى وأنا مستعد أتكفل بكل أنواع البخور والتمور .

تحياتنا اولا للمدام وحمدالله علي سلامت الوصول والحمدلله الذي جمع شملكم ومشاء الله تبارك دائما وابدا بشري
لكن اخونا الامير لاي مسجل غياب مابعرف هو في سبات شتوي والله شنو والله يكون نزل البلد يزرع القمح
وكدي النشرب معاكم جبنة المانيه ونحكم بعدين ههههه تحياتنا مرة اخري للمدام والابن ايمن

الجبنة عزيزتى بت الفكى الان بريطانية وليست المانية والغريب فى الامر والان وقبل ربع ساعة جات المدام وشالت (من العينات المعروضة للسروق ) كرتونه بلح ولم تتكرم بمدى بفنجان قهوه وعندما (أحتجييت ) قالت لى ياراجل من بتيين بقييت تشرب القهوه ؟؟!! قلت ليها من الشهر الفات مع وصولك وعلى العموم كانت العله أن الفناجيين السودانية لسع ما أشتريناها وسوف نشتريها إن شاء الله دسته الاسبوع القادم ولى الوقت داك إن شاء الله يكون الامير الاى قمحو مرق !!! . تحياتى ومن بيرمنجهام سلام .