اخترت من دون العيون يا غالية عينيك أعشقها واخترت شوفتك كل يوم لو حتي شوفتك أسرقها
لكني مالاقي الفرح لا في البعاد لا في اللقاء وما من هواك انا اصلي عاد خلقوني من طين الشقاء
انا مديت كتير كتير حبل الصبر لامن فقدت انا أولو ومن غير صبر بقدر أساي ياغالية شانك بحملو
وبس لو سمحتي ومرة بس داير قليبك أسألو حافظ معزتو ذي زمان ولا الحصل كان بدلو
والله يانور العيون أصعب سفر سفر الامل ما تلقاك تعاين في الهدف وما داري انت متين تصل
كل الدروب جربتها سافرت فيها عشان أصل وفي كل مرة ألف واعود من تاني لي نفس المحل
سيبي العواطف ديك بعيد وانسي ريدك وقولي لي إيه الفرق لو زول زرع آمالو في أخصب ودي
والتاني روح للبعيد واختارلو يا محبوبة صي حيحصد الاول اكيد والتاني ذي حالتي العلي
لو جيتي تسألي عن هواي بلاهي اسألي عن هواك تلقي الجواب نفس الجواب ما قلبي يادنياي معاك
ارجوكي اوعي تفكري انا قلبي يصبح لي سواك لكنو لو فقد العشم يمكن اقولو خلاص كفاك
وانا عارف المواجع لي براي انا طول سنيني ابكي وانوح فقدت احساس الالم ياروحي من كتر الجروح
وما بلقي عارف فرحتي غير فيكي يا ام وجها صبوح مناي كل القلتو ليك انا تاني ما بقدر ابوح