أعذرونى يا ناس !!!

الاخوان الاعزاء بجمييييع المنتديات التى أشارك فيها تحياتى وأشواقى ولاشك أن غيابى عنكم (أضنانى ) ورأيت أن تجدوا لى العذر من خلال هذا البوست .
ثالث أيام العيد فى بيرمنجهام بيريطانيا الثلاثاء قدّم لنا الاخ والجار السابق أبوبكر بشرى السيد الدعوة للغداء بمناسبة زيارة صديق له مع أسرته من النرويج وبالفعل قضينا وقتاً طيباً وقد أقترح بكرى أن ندوّر لينا عشرة أربعتاشر فأشترطت على الاخوان الاربعة أن لاينفّوت الصلاة فى المسجد المجاور لشقة أبوبكر بشرى خمسة دقائق بالارجل وقد كان ، للأسف الاسيف كانت العشرات تلاته عشرات كلها شلتها أنا ولم أكتفى بذلك بل جريت بكرى صاحب المنزل خمسين مرتين عندما لعبنا رأس فى أخر العشرة التالتة بعد أن حرق الاخوان يعقوب الضيف وأبوبكر محمد على الشيخ وقد أشتاط أبوبكر بشرى السيد غضباً ومازال يتوعدنى بالرد .
اليوم التانى كانت العزومة عندى وكاد أبوبكر أن يتسدى ولكن أخذ عشرة واحده وأخذت أنا عشره وأتسدى خمسين واحده !!!!!، اليوم الثالث لم نلعب فى شقة أبوبكر محمد على الشيخ وأكتفينا بالونسة عن تجاربنا فى أروبا ومستقبل وجودنا وحلول المستقبل والتى كانت مع الوضع الراهن فى السودان كلها تشير الى البقاء أطول فترة فى المهاجر الاوربية ونسأل الله أن ينصلح حال السودان .
الامر لم يقتصر بالانشغال بالضيوف والعوازيم والعشرات الكوشتينية فقد وصلنى (الرقم الوطنى من الاخ بكرى أبوبكر ) صاحب موقع سودانيز أون لاين وقلت كدى دخلت فى الموقع الدخول الماخمج واتجدعت فى اليوم الاول ب20 موضوع والحالة وقفنى الحاسب الالى وكنت ناوى (اخفّس ) التلاتين موضوع فى اليوم كعادتى حسب ما تعرفونى عندما أشارك فى المنتدى الجديد !!!.
صراحة المنتدى حوش كبير تسلم وترد على كل أهل السودان نامن تقول أنا لاقييت السودان كلو فى حوش بكرى أبوصلعة !! عشان كدى والله ما أدس عليكم (رطبت ورخمت ورديت وما خليت !!!!) شىء كورة وشىء حبييب نورة ..... وشىء هيثم مصطفى وشىء الباترا وشىء شرطة قدمية وجديدة ولواءات وتحيات وحكمدارات، وشىء حكومة مؤقته !! وحتى بين السُره والركبة فى!!!!! ولكن ما فى داعى أجييب سيرتو أصلو الناس هناك تكتب ماتشاء وترد ماتشاء وماخده راحته بالكامل أظن مافى مقص رقيب ولا نقيب!!!!!! .
لذلك قلت أوريكم الحاصل على وعشان تعذرونى لان الجديد شديد وأسع عندى فى سودانيز أون لاين بس 60 موضوع تقريباً !! فى 5 أيام علماً بأن أقل مواضيع عندى فى المنتديات الاخرى والتى فى جملتها تصل ال30 منتدى من 400 ومافوق وأعلى مواضيع فى منتدى السقاى ما يفوق ال6000 خليتكم عافية وتعليقكم وردودكم تهمنى ومن بيرمنجهام سلام سلام سلام .

انت اصلا من زمان ماك زولا هوين . ومطلوب انك تعذرنا نحن يا اخي الكريم

فيصل عبدالوهاب الاميرالاى شخصياً يا أخى بركة الشفناك وبركة (البقييت حى ) والله شفقتنا !! عزرناك فى الكتابة لكن عدم الرد على هواتفى ( زعلنى وما عزرتك فيهو !! جرس طويل أكثر من 17 مره فى فترات متباعدة لا يوم ولا يومين !!!!)
يا أخى أدينا خبرك ولو ترد على مكالمتى الحكاية شنو (غاتس فى البطاطس !!!) إن شاء الله تكون حصلت الخريف الكارب ده فى القضارف وزرعت ليك 1000 فدان . وفى العدم إن شاء الله 500 فى سنار .