مسدار الصباح تأليف وقطع ونجر بشرى مبارك مشارك به فى معظم المنتديات

مسدار صباح الأربعاء 21 سبتمبر والمسدار عن الطلح والكلييت والمناسبة أن هناك منتديات بها بعض المواضيع والردود المسلية ومنها منتدى الراكوبة وموضوع عن (الطلح والشاف) ووجدنا الناس مكسرين رجال ونساء صغار وكبار فقلت أضيف للبوست مسدارين تلاته أسخن بيها المواضيع فقلت :

الشاف الشاف والكلييت تكلوه جوه البييت
والداير الطلح الداير الطلح ما بنفعو الخرييت
فى أبرووف هناك وفى كوبر كمان والله لو قرييت
كم مره غشييت وكم مره أشترييت وأصلى أصلى ما خلييت
بس أرتحت منو وعشرين سنه ممنوع فى أروبا وليهو ما شمييت

بت كردفان ما شفنا شىء ولو شفت شىء
لو شفتى شىء قولى لى عابره ما ما تختشى
بنقرأ بس والعين مغمضه لكن بنسمع ما تكشكشى
جابنا الخبار جابنا الشمار يا عابره إنتى صوت الرياح بتوشوشى

مالو الطلح قوم عييبو لى ما تنفطح
مع الطلح أم العيال وأبوالعيال تب بنصلح
لو غالى أو لو كان رخيص لا بجرح شعور ولا جرح
زى (ساونه بس ) ناقصه القزاز ما هو البخار والساونه برضو بتنفتح

بت كردفان ما شفنا شىء ولو شفت شىء
لو شفتى شىء قولى لى عابره ما ما تختشى
بنقرأ بس والعين مغمضه لكن بنسمع ما تكشكشى
جابنا الخبار جابنا الشمار يا عابره إنتى صوت الرياح بتوشوشى

الرائع بابكر يوسف أبوشامة لك الود وأنت تطل علينا بهذه الابيات وكنت ويين (يازوووول من زمان ) على العموم كثيراً فى الغربة ما نتعرض للسؤال عن كلمة زول وأذكر قبل شهر قلت لأحدهم سوف أحضر لك مقال فيه تفصيل معنى زول والتى تفارب 17 معنى فى اللغة العربية الفصحى فيبدو لى أن هذه القصيدة تضاف الى تلك المعانى والجايى أحلى :

الزول ما هو ساهل والزول سمح فى طباعو
ما بزعّل عليك ويخدمك يساعدك بمالو ضراعو
غنو لى وقالو كتبو لى المقالو فى وصفو كرمو وباعو
ما بتندم يمين ولا بصّر الجبيين ويضحك ويملا يملا ارباعو

الاخ العزيز الشاعر العطا على العطا بمنتدى البركل رأيت اليوم أن يدور مسدارى الصباحى عن مسدار يرد فيه إسمك من خاطره صباحية تذكرتك فيها وكتبت هذا المسدار ، أتمنى أن تواصل فيه بمسدار وتعليق ولك ودى ومن بيرمنجهام سلام .
أفيد الاخوان جميعاً وخاصه ناس السقاى أن الاخ العطا على العطا من البركل وقريب أبناء محجوب أرباب وصديق الاخ التاج محجوب أرباب وقد كان لى شرف التعرف عليه فى إجازتى الاخيرة فى العام 1010م فى رمضان وأنا مسافر وكان ذلك بمطار الخرطوم ، كما أرجو أن تبلغ تحياتى للاخ التاج الشايقى (العريس ) وقول ليهو مالك هارب زى مريخك !!!!.
مالك هارب زى مرييخك ومالك ماسح لى تأريخك!!!!.
والان ندخل فى المسدار الخاطرة أما مسدار التاج وهروب مريخة فسوف نواصله فى مناسبة أخرى وصلو يا العطا البيت الاول وقول ليهو الباقى بعد الممتاز !!!!.

طلييت سريع زى طلّت الطير الطير القطا
ورغم الدقائق والثوانى أجزلت أكثرت أكثرت العطا
وأنا كنت سارح ويادووب أكلم فى الصحاب وصاحبى العطا
بالله أسرع فى الخطى فى الخطى وقرّب تعال تعال فووووت الوطا
ممكن تحصّل ممكن تحصّل لمحة منو إمكن تقُص تقُص دربو دربو وتطأ

--------------------------------------------------------------------------------

المسادير نقلاً من منتدى العيلفون والحوار فى كرسى منتدى العيلفون مع الدكتور العلامة عمر أحمد فضل الله ودالفحل

حياك الله أخي بشرى، وأنا لا أقدر أن أجاريك في شعرك الجميل:

سمّوك ود الفحل وفعلاً فحل فى مُسمّى
يارب يا كريم يدييك من نعيم وبيك حا نتلمّم
يا خالق الوجود ويا من أنزل القرآن وسورة عمّ
حقق للسودان إيمان فى الجنان وحّد للصفوف وخليها كيف تنتمّه

ولكن لزم أن أرد عليك بمثله فأقول:

يا ود مبارك مدحك بيشد الهمة
راسي عديل كبر لامن جدعت العمة
لو كنت شاعر جد باعرف النمة
كنت أرد عليك بالحيل أوَفِّي الذمة
يارب يا كريم تصلح لحال الأمة
وترحم جمعنا يوم الخلوق تتلمَّ

مسدار الصباح اليوم الاربعاء 14 ديسمبر وقد أحتفلت العاصمة الخرطوم بالقوات المسلحة السودانية وهى تعلن تطهير جنوب كردفان والنيل الازرق من التمرد ونحن نرفع الاكف بالتحية لكل قواتنا المسلحة والقوات النظامية الاخرى من الشرطة الموحدة وجهاز الامن الوطنى رأبنا أن نكتب مسدار لهذا الحدث الكبير ونقول فيه :

فرسانا البواسل جنود الشعب سلام وتحية
ومنصوريين بإذن المولى لى سودانا إنتو هدية
نضفتو البلاد وريحتو العباد سرايا المية جنب المية
فى جنوب كردفان وفى الازرق كمان ضحيتو ألف ضحية
وصليتو مع الرئيس مع البشير مع المشير قائد قائد وصادق نيّة

بما أننى طوّلت الغيبة من مسدار الصباح وتحول الامر الى مشوار الصباح على كبرى المحال التجرية مندوباً للمبيعات رأيت وأنا ونحن وأنتم وهن وهم نستقبل العام 2012م يوم الاحد أن أستهله بمسدار يبحث فينا كل شخص على حده كيف عرف أنه فى العام 2012م من خلال نفسه فإلى المسدار :

--------------------------------------------------------------------------------

عرفت أنى فى العام2012م بنظرة فى وش المرايا
تذكرت أيامى الصغير وكيف مشيت ولبست لى شنطة جراية
وبعدها جييت لى أروبا الفيها الولادة كذا نجوم وما فيها ما فيها داية
وعرفت أنى جد كبرت والشيب كتر والصلعة برضو وبرضو نضارة قراية

مسادير الصباح اليوم الاربعاء 18 يناير 2012م سوف تكون إن شاء الله خماسية تتناول الشأن الرياضى والسياسى والاقتصادى والاجتماعى والاحتفائى والشرطى والامنى وسوف أفرد تعليق قبل كل مسدار ولنبدأ :

يدور فى الاوساط الرياضية إتهام صريح لرئيس نادى الهلال الامين البرير بأنه سب الديانة فى أكثر من واقعة وكنت أخال أن سب الديانة قد أنتهى عندنا فى السودان ولكن للأسف (الاسيف ) كما يقول الفاتح جبر أن سب الامين البرير تكرر فى أكثر من واقعة فقد ظل يردده صلاح إدريس الارباب رئيس النادى السابق فى أكثر من مناسبة وقرأت بالامس أن مدير نادى الهلال سوف يقاضى الامين البرير فى سب الديانة وهذا أمر يؤسف له وسقطة عظيمة فى حق الاخ الامين البرير فقلت فيه :

لو سبّ الديانة الديانة والله والله بنعاديهو
إلاّ يتوب ويرجع ويستغفر لكل ماضيهو
الدين الدين ما لعب والدين ولا ناديهو
لو أصبح ده حال الرئيس هلالنا بنخليهو
الاخلاق الاخلاق واللسان وقروشو ما بتفديهو

* المحطة الثانية فى مسادير اليوم أخترناها عن الاعتداء الذى حدث على من أقام الاحتفال بالإستقلال السبت الماضى فى بيرمنجهام وأرى أن الجهة التى أقامت الاحتفال (المؤتمر الوطنى ) وقوى الهامش قد خسروا كثيراً فقلت :

ما كان ليهو داعى الاحتفال واللمّه
ويا ريت لو جلسنا فى حلقة سورة عمّ
تركنا عدييل بلادنا بلادنا قلنا لو ننجمّه
جاتنا يميين محن محن كمان معاها مذمّه
أصبح حالنا حالنا فرقة وشتات وأنّفك ما بتلمّه

المحطة الثالثة فى شأن فريقينا القومى ومبارياتة الثلاثة والتى أنهزم فى إثنين منها وتعادل فى الثالثة بدون أهداف ولم يمنّ الله عليه بهدف وحتى وحيد (مافى حتى رسالة واحدة بيها أتصبر شوية!!!) فقلت فى شأن الفريق ومدربة الصامد كأبى الهول (محمد عبدالله مازدا) والله حق لنا أن نطلق عليه أبوالهول بدلاً من مازدا أو الهرم الاكبر !!! فقلت :

القومى فريقنا نتايجو جد جد بتخوّف
وما أحرز هدف وهجومو حالو يعوّف
مازدا ما جاب جديد وبى حالو جد جد متكييّف
لا هجوم لا دفاع ودفاعو دفاعو كلو (مُسييّف)
وييين يا ناس هجومنا ما فيهو أصلو (حِرييّف)

المحطة الرابعة مفاوضات البترول والمسائل العالقة بين دولتى الشمال والجنوب فى السودان والمقامة حالياً فى إديس أبابا برعاية أمبيكى رئيس جنوب أفريقيا السابق الجنوب متشدد والشمال غير متازل ومتشائم فقلت فيهم :

أرخو الشِدّة مره وحال البلد فى أزمة
والناس جد فى فلس وبلادنا كيف منقسمة
شوفو الحل مناسب مناسب والغيط بدور الكظمة
أنسوها أنسوها المغايس وفكوا الرُباط الرُباط من حزمة

والمحطة الخامسة والاخيرة كشف التنقلات فى قوات الشرطة والذى تم الشهر الماضى ومن أعرف ممن نقلوا اللواء طه جلال الدين على من الشئون الاجتماعية ولاية الخرطوم الى مدير شرطة جنوب دارفور اللواء ناصر محمد يوسف من مدير شرطة محلية بحرى ولاية الخرطوم الى مدير شرطة السجل المدنى واللواء عباس الطيب يوسف من المباحث المركزية بحرى الى الولاية الشمالية دنقلا بالتوفيق للأخوان فى المواقع الجديدة ومزيداً من النجاح والابداع وقد قلت لهم :

لى كل زميل أرسل سلامى ودعوة
بالتوفيق معاك فى كل خطوة وصحوة
بلادك بلادك ليها أمّن ما يبقى جانبك كبوة
ويا حارس الاسود الاسود أتذكر معاك اللبوة

لاشك أن التوقيع على الاحرف الاولى الذى يتم مع وفد دولة الجنوب فى أديس أبابا قبل ثلاثة أيام التوقيع على الحريات الاربعة وترسيم الحدود دون الحديث عن النفط أو أبيى يجد الان رفضاً كبيراً من معظم قطاعات الشعب السودانى خاصه منبر السلام العادل وعلى رأسة الباشمهندس الطيب مصطفى رأيت أن أوثق لهذا الرفض بهذة القصيدة فإالى القصيدة :

حريات أربعة مرفوضة ما بندورة
وأحسن لى وفدنا نرميهو بالبندورة
ويين المجلس الوطنى ؟ وين الشورة
وويين الشعب ؟؟؟ أحسن رقدة المطمورة
وييين يا تنقا يا طاشين ويا الثعلب ويا كندورة
وييين مريخنا وينو نجومو وينو نجومو ناس الفورة
ووين ضُباطنا ويين التاج والدبورة
وينو رقيبنا وينو عريفنا أب جاعورة
إسود والله معروفيين بفكو البورة
وما دايرين نرجع لنيفاشا البقت ماسورة
دعونا المولى دعونا كتير يارب فكنا وساجورة
*************************

يا ساستنا ما معقول ..... يا مفاوضينا ما معقول
كيف الانفصال معقوول ... وحريات أكون مسطول
كلام والله ما مسؤول كلام..... حيّر عدييل لى دقول
قبل الانفصال ما يطول .......وما يتم السنة والحول
يقولو نريده حريات لكل الشعب كل الشعب وبنتنا شول
عليك عرزينك المبهول .... يكون فى عقولنا زول مهبول
يوافق يدى حريات !!!!..... وين يا سيفنا يا سيفنا المسلول
والله النموت أحرار .... نموت أحرار وما أحضر أكون مشلول
وكيفن نرضى بالرخصة والذلة... والمرض البجينا البجينا فصول
ناس بى حرية قالوها ....... بى حرية قالوها عايزين البلد مفصول
وكيف حايرجعوا الكلمة ......حايرجعوا الكلمة أظن حايلبسونا حجول
وكيف حايرجعوا الكلمة ......حايرجعوا الكلمة أظن حايلبسونا حجول

بصراحة ومنذ أن عاد وفد السودان لمفاوضات الجنوب قبل أسبوع وأكثر (بموضوع الحريات الاربعة ) وجدت نفسى فى حالة إحباط خاصه عندما أطالع صحفية الانتباهة والتى وقفت تنّفد هذه الحريات والتى لا أرى أى مبرر (لأولاد نيفاشا ) من شمال الوادى أن يوافقوا عليها لا بالأحرف الاولى ولا بدون أحرف ذاتو !!اليوم طالعت مقال كارب من العميد محمد عجيب كتبة فى جريدة القوات المسلحة وهو رئيس تحريرها السابق ، المقال ومجريات الاحوال قادتنى الى هذه القصيدة وقد لاحظت أننى فى الفترة الاخيرة غيرت مسار الشعر من المسادير الى القصائد الطويلة فمعذرة الى من تعودوا على مطالعة المسادير فى هذا البوست ، وأرى أن سبباً أخر هو أن تواجدى على المنتديات أصبح بالمساء فقط ولساعتين لاننى مشغول جداً مع المعايش والعمل نسأل الله أن يوسع فى الرزق ، والان أسمحموا لى أن أقدّم لكم القصيدة :

آه ..آه ... للسودانى يا المكلوم
وجاك راجع شعب جنوب للخرطوم
بعد ما صوّت صوّت قريب مية وقال محروم
وصوت للإنفصال فرحان فرحان وما مهموم
وقّف ضخ وقّف ضخ لبترولو وقال قال مختوم
وغيّر عمله بدل عمله بى واحده وملاها نجوم
ودّع ...ودّع ... ودّع وقام يوم ودّع الخرطوم
وسافر عكس تيارو والنيل النيل الصبر لى هموم
************************
وما تمّ نص الحول قال عايز لحريات
لحريات مع الخرطوم مع مدنى ومع سنكات
كلام ما قالو أصلو أشول كلام قالوهو خواجات
ديل هم راهنو بالحرب وكان الدعم الدعم دبابات
وليه يا وفدنا الغالى تخون العهد لى خاله وحبوبات
ديل أُمات ختم وبشير أُمات شُهدا شُهدا منصورات
عليكم الله أختونا وفارقونا خلاص خلاص ودعنا حريات
وما بنقبل ما بنقبل جنوب تانى إلا نكون جمييييع أموات
وما بنقبل ما بنقبل جنوب تانى إلا نكون جمييييع أموات

أعود اليوم بعد توقف دام أكثر من شهر وإسبوع والله خلال هذا الشهر دارت فى خواطرى الكثير من المسادير ولكن زحمة (البزنس والعمل حالت دون أن أكتبها فى المنتديات ) واليوم ورغم زحمة العمل دخلت المنزل بغرض توصيل مجموعة من الملابس من الغسيل الجاف ومن الامس يدور فى رأسى مسدار عن مرض الغرور ونصيحتى فى شكل مسدار لكل أخ ولكل مسلم ومسلمه أن يتناول هذه الابيات الخمسه (جقمة واحده ) علها تشفى أمراضنا جميعاً وأقول فيها :

ما تطلع فى الكفر حالاً يزوغ يرمييك
وابعد من غرورك خليهو ما يوالييك
العن للرجيم ما يلقى وقت وقت يغوييك
أبقى الفاروق عمر أصلو أصلو مايبارييك
لو فجّك فجّك سلك بسم الله بسم الله بتداوييك

» بشرى مبارك إدريس من بيريطانيا بيرمنجهام ومن السقاى شمال بحرى ضيفاًعليكم
» قصيده العيد من بشرى مبارك
» أنا من بحرى .......أنا بحراوى وقصيدة من بشرى مبارك
» رمضان كريم... زيد فى نجاحك وقصيدة من بشرى مبارك إدريس
» سيد عوض فى الشرطة كان مييت كمد وقصيدة من بشرى مبارك إدريس