الحكومة القادمة كشق تنقلات لوزراء المؤتمر الوطنى ...وقصيدة من بشرى مبارك

منذ أن أنفصل السودان البلد الواحد فى يونيو الماضى وأصبح السودان الشمالى دوله والسودان الجنوبى دوله أخرى وغادر كل الوزراء من الحركة الشعبية وغيرهم من أبناء الجنوب السابق الى دوله جنوب السودان الجديدة والرئيس البشير وطاقم حكومتة يبشر ويعلن أن الحكومة القادمة سوف تكون حكومة جبهة عريضة أو حكومة وحده وطنية تشارك فيها كل الاحزاب ، وبدأت الحكومة فى مشاورات مع الاحزاب الكبيرة لغرض المشاركة وأستمر الحوار لمدة 3 شهور أسفر فى النهاية عن رفض حزب الامة الاصل بزعامة الامام الصادق المهدى والحزب الاتحاد الديمقراطى بزعامة مولانا محمد عثمان الميرغنى عن رفض المشاركة بالحكومة ويبدو لى أن كلا الطرفيين تعنت فى موقفه ، رشح من التسريبات الاعلامية أن الحكومة القادمة سوف تكون عبارة عن تنقلات بين وزراء الانقاذ والمؤتمر الوطنى الذين ظهروا على ظهر دبابات الشيخ حسن عبدالله الترابى عراب الانقاذ والعميد أرنكانحرب عمر حسن أحمد البشير قائد إنقلاب الانقاذ فى 30 يونيو 1989م .
والشارع يتحمل الحرب الدائرة والغلاء الطاحن وحتى على المستوى الكروى إخفاقات فرقنا على مستوى الاندية المريخ الذى خرج من دور ال32 والهلال الذى وصل دور الاربعة بالعافية وعلى أكتاف الاخرين رقم أن مدربة وعضو مجلس إدارته أحمد آدم (أحمد عافية ) وكذلك إخفاقات المنتخب القومى والذى أنهزم فى عقر دارة ووسط جماهيرة وكان يكفية التعادل فقط!!وتأهل بجهود الاخرين حالة حال الهلال الذى تأهل بجهود أنيمبا والذى هزمنا فى مقبرة الابطال والتى أصبحت مقبرة الهلال نفسه بعد تلقيه لهزيمتين قاسيتين الاولى من أنيمبا والثانية من الترجى وأمامنا 3 أيام نخشى من تكرار مويه ترباس والخمسه أهداف !!!.
ونحن نعيش كل هذا الاحباط السياسى والازمات والغلاء والاحباط الرياضى تكون قصائدنا على شاكلة كل إناء بما فيه ينضح !!فكيف أكتب وأنا لا أسمع من الهاتف على مستوى الاسرة أو من الزملاء والاهل والاصدقاء وكذلك فى الفضائيات على مستوى السودان إلا أخبار الحرب والغلاء والهزائم الرياضية فكتبت وقلت :

عشرين سنه بل قد تزيد وياها نفس نفس الكنكشة
رقوا الوزير نقلوا الوزير من غير مخافة وإختشى
مفروضة بس إسماء هى ثابته أصلو زى فرض العشاء
والوجبة عادت وجبة واحدة مافى الفطور مافى العشاء
والشعب الشعب نايم أهل كهف ومافى حتى الوشوشة
يا حليل زمان يا حليل زمان الناس تقوم هى منعنشة
تقلب حكومة تقلب نظام تجييب جديد جديييد كما تشاء
يا شعب يا شعب يا رائع عظييم متحمّل الظلم الفشى
شوف حولك العالم يموج يموج والارض كيف متفرشة
والسماء ليهم لحاف ما يغطى ما يغطى رجلو يكاوشة
آلآف فداء اليوم النشوف ما يجينا زول حايحوشة
الماء والكلاء والوظيفة للجميع ومربوطة ماها مبوّشة
صامولة الوطن الوطن إنحلج وفارقنا راحة وكندشة
يا حليل زمان أيام نميرى ويا حليلو أحمد من تشاء
نجتر فى ايامنا ايامنا الخوالى وغُنانا أصبح تشتشة
لا كلمة لاكلمة لا اللحن القديم أولاد تجييك متحمّشة
لا تلقى لحن لا تلقى صوت والله نمشى نمشى نبلشة
وظيفة وظيفة للدكتور فلان وشهادتو قالو مغششة
لكنو لكنو جاى من الامانة واسطاتو بدرى مكاوشة
وكورتنا قلنا معاها نفرح لاعبيين مرض ولا أختشى
راكبيين همر أخر موديييل وفلاحتو كورة يقرشة
لا مصرى نافع بس مرض واللكمة قاضية نفتشة
وأخر الزمن ضاعت همم كانت قمم فتّش معاى وفتّشة
إمكن تكون أخرالزمان قبل الحساب والنار نزيده نحمّشة
إمكن تكون أخر الزمان قبل الحساب والنار نزيده نحمّشة
يارب أغفر للجميع وارحم عبادك يا كريم أكتبنا من ناس العشاء
يارب أغفر للجميع وارحم عبادك يا كريم وأكتبنا من ناس العشاء

الى بشرى العزيز

لو ما بعرفك جد كتير ,, كت بقول الزول دة راسو محششة
يا بشرى يا زول يا خطير ,, فندت حالتنا الغريبة ومدهشة
جريت قلم قرب يطير ,, في السياسة الكالحة نورا مغبشة
والكورة ذاتها يامدير ,, خليها بس ما تنبشا
في امدر , كمان عز الطهير ,, اتنينا تب تملى الحشا
والله يا بشرى الامير ,, خلن عيوني مطششة

لابارك الله في اللي كانوا السبب ..

سلامة عيونك يا أمير ما بقت للطشطشة
والله يجازى من كان السبب !!وما عرف كيف ملمسه
ناس الدحيس ناس جكسا كيف وقاقرين أولاد يقطعوا فى الحشا
لعبوا الكفر كوره وقراية وأخلاف كمان وعروض جميله وما شفنو كوره مقرشه
باص بالكعب قون بالشبال باص فى الخيال لو فى المريخ أو فى الهلال الكورة كانت مدهشة

يا بشرى كيف , نجيب بطولات كبيرة .مدندشة
والحكاية ,فاقد تربوي , ثقافة ( تك ) ما تفتشا
جمهور مليان بالغم والاسف , ولعيبة فايقة , مفرفشة
عند ست الكوارع والحلل , بعد ( العراق ) والحشحشة
والله مليون سنة , ما نجيبوا كاس , لوكان صفيحة نكشكشة
ولو لعبنا برانا , من الصباح حتى العشا
يا ها حالة ثايتة فينا معششة
يا عم بلا كورة ومسخرة وكترة فضائح وغشغشة

كورة الكبار والله زى (دبابير الرانكر ) القال عليهم نابليون قولته المشهورة تختار أكفأ صف ضابط لكى تخرج منه أسوأ ضابط (مع إحترامى لكثير من الرانكر الكانو مالين قاشم وما موريميين فشفاشنا وفشفاشم !!!) .
والله كورة بس كانت مرض
والله أحسن لو تلقط فى قرض
زى عقدك السمح الجمييل قالوا انفرط
وزى زوولك الهادى الرزيين لمن بكى وقام انعرط

» هجليج تنادييكم .... وقصيدة من بشرى مبارك
» أنا من بحرى .......أنا بحراوى وقصيدة من بشرى مبارك
» لو طرنا حانطيير بى شرف ... وقصيدة من بشرى مبارك إدريس
» سيد عوض فى الشرطة كان مييت كمد وقصيدة من بشرى مبارك إدريس
» رمضان كريم... زيد فى نجاحك وقصيدة من بشرى مبارك إدريس